哭了(下集)..

經過咗10日既獨立隔離治療, PETER仔今朝終於轉到黃大仙醫院繼續療程...
佢唔再需要單獨被隔離, 而家有同房, 有電視, 有人氣, 對於我唻講, 真係1個好消息!
雖然環境唔夠北區好, 但係轉得院就表示病情有好轉, 希望唔駛過多好耐佢就可以出院啦...:P
其實今日超攰呀! 去醫院睇佢之前, 我, MARY姐同家姐大汗叠細汗咁去咗黃大仙廟拜神,
希望神明保祐爸爸可以早日康復出院..跟住返咗家姐屋企反煮飯仔..同住仲做埋到會添!! 簡直一條龍服務!
去到醫院, 家姐見PETER仔好似成日想講嘢但又好似講唔到咁..
問佢:「係咪有痰呀? 係咪氣喘呀? 係咪......」
PETER仔答:「唔係..無嘢..」
跟住PETER仔粒聲唔出咁攞咗張紙巾抺眼, 跟住我哋發覺有啲唔妥, 問佢做咩, 點知...
佢話:「無..我一時感觸啫..見你哋成日咁頻撲唻...」
呢次, 係我同家姐同MARY姐第1次見到佢喊, 大家個心都酸一酸, 大家都唔知講咩好...
(大家都不知所措..好在無4條友1齊喊咋, 如果唔係人哋睇到仲以為我哋做乜鬼呀=.=!)
只有我掃一掃PETER仔既膞頭以作安慰...希望佢知道, 其實大家都好錫佢, 大家都咁緊張佢..
希望佢今次真係識驚, 真係識保重自己身體啦!!
探完PETER仔之後, 我同MARY姐就打道回府!! 返去之前仲請佢"girl"咗個扒添!!! 不過只屬1般囉..-.-
亞龍呢排唔知搞乜鬼, 好似轉咗性咁喎! 鬼死咁好...返屋企前仲喺樓下公園陪我餵喵...
咁都不特只喎, 我仲竟然發覺, 喺我出咗去既期間, 佢竟然洗~咗~個~廚~房~~~~~~~

唔得! 我要開始煮飯!!:)
希望唔開心同埋令人擔憂既事快啲過去, 好消息陸續有來!!!XD